Buelonan di JetAir no ta trese muchu alivio ainda, ni pa loke ta traha falta di kapasidat, pero tampoko pa loke ta trata preis mas barata. Pòtret: ABC Online Media

KRALENDIJK- Último dianan por nota un skarsedat enorme di lugá pa bula di Kòrsou pa Boneiru. Buelonan di ambos Divi Divi i EZ Air ta yen dianan tras otro. Partikularmente entre 24 i 28 di febrüari e situashon ta hopi penoso. 

Pasaheronan ta hañando buelo si pa bai Kòrsou, pero e binimentu bèk actualmente ta e problema. 

Ounke ku JetAir resientemente a agregá Bonaire na su ret di destinashon, esaki no ta trese masha alivio ainda. JetAir lo bula solamente dos biaha pa siman, i hopi biaha via di Aruba. Esaki ta nifiká ku pasaheronan ta dura mas ku 2 ora pa un buelo ku normalmente ta dura entre 15 pa 20 minüt.

Karu

Tambe mester nota ku e buelonan di JetAir aind ano ta trese alivio tampoko pa loke ta trata preis. Voral den e dianan aki ta nota ku un pasasi di ida so ta kosta manera 115 dòler o sea 230 dòler pa bai bin. Esaki ta sigur un 30 dòler mas karu ku ta e kaso ku Divi Divi òf EZ Air.