KRALENDIJK- Lesadónan di Bonaire.nu, Awor.nu i BES-Reporter ta premirá ku partido Demokrat i partikularmente Clark Abraham ta bai gana elekshon di dia 15 di mart, 2023. Esaki ta bira kla despues di a analisá resultadonan di un enkeusta via di internèt ku a ekekutá dianan tras di lomba. 

Di tur e 535 hende ku a yena e enkuesta, kasi 19% a indiká ku na e momentu aki nan ta inkliná pa vota pa líder di Demokrat, Clark Abraham. E di dos polítiko mas popular, segun e mesun enkuesta, lo ta e kabesante di Movementu di Puelbo (MPB) ta Hennyson Thielman. Segun e lesadónan mas ku 12% tin intenshon di vota pa Thielman. E di tres persona mas popular den e enkuesta a resultá Delno Tromp. Ocho porsiento di e lesadónan ta indiká di lo vota pa Tromp. 

E di kuater persona mas popular a resultá lider di MPB, Elvis Tjin Asjoe. E lo por konta ku algu mas ku 5% di tur votonan. Humphrey Wout Jr. (tambe MPB) ta skor sorprendentemente bon pa un polítiko relativamente hóben. Segun lesadónan di ABC Online Media Wout lo haña mas o ménos 4% riba su nòmber. 

E respondentenan ta ménos positivo tokante James Kroon (UPB) i Daisy Coffie (M21). Den e enkuesta nan ta skor relativamente about ku respektivamente 1,6% i 1,4% di e votonan. Ku esaki nan ta keda tras di hendenan manera Taty Frans i Gianni van den Heuvel, ku kada un lo por konta ku 1,8% di e votonan. 

Koutela

Direktor di Linkels & Partners, sikólogo Harald Linkels ta urgi pa tuma e resultadonan ku koutela. “Den enkuestanan den pasado nos a mira ku ora di hasi enkuesta ònlain por mira sierto intento di manipulashon. Den e kaso aki tambe spesialmente dia dos i tres ku e enkuesta tabata ònlain, por a mira ku simpatisantenan di sierto partido a kuminsá yena e enkuesta masalmente’. Tòg, segun Linkels ta bisa, e tendensia tabata hopi kla for di komienso. “Tin hopi hende ta indiká ku na e momentu aki nan tin intenshon di vota pa oposishon i partikularmente pa Clark Abraham”. 

Enkuesta personal

Pa ta mas sigur ku e resultadonan di e enkuesta ònlain ta duna un imagen representativo di tendensianan di voto, un total di kuater persona den dianan tras di lomba a hasi enkuesta tambe riba kaya. “Den dianan ku ta bini lo analisá e resultadonan i lo kompará tambe resultadonan di e enkuesta ònlain, ku esnan ku a hasi kara pa kara”, asina Linkels a primintí.