ORANJESTAD – Ministerio di Infrastruktura na Aruba  ta designá kuater mion florin èkstra pa drecha e kareteranan malu riba e isla. E sèn ta bini riba e 3,6 mion ku a reservá kaba riba presupuesto.

E sèn no ta destiná solamente pa mantenshon di kaminda ku ta atrasá, pero tambe pa kareteranan nobo i plenchinan di skol ku mester di mantenshon urgente.

Segun gobièrnu e mal estado di e kareteranan di Aruba ta debí na e echo ku durante di corona no a invertí dos aña den kareteranan riba e isla: no tabatin sèn.

Klima 

Gobièrnu ta basa esei riba e klima ku ta kambiando, lokual ta hunga un ròl kada biaha mas grandi na Aruba. Temperatura di awa i klima ta subi mundialmente, loke ta kondusí na mas awaseru. Konsekuentemente e kareteranan ta rekerí mas mantenshon i reparashon.

Tambe a ripará ku den e añanan promé ku e pandemia, estado di kareteranan a bai atras pa falta di finansiamentu. No a hasi mantenshon preventivo pasobra práktikamente e sèn a bai pa konstrukshon di kareteranan nobo.

Promé minister Evelyn Wever-Croes ta bisa ku di 2017 te 2020 a usa alrededor di sinku mion florin pa aña na kareteranan. Setenta porshento tabata pa kareteranan nobo i trinta porshento pa mantenshon di kareteranan.

Término largu

Segun prome minister Wever-Croes ta trahando riba un plan di mas aña, kaminda ta inventarisá e nesesidat di e kareteranan na Aruba i ta disidí kuantu sèn mester pa pone nan den bon estado bèk i asfaltá kaminda ta nesesario.

Ta repartí e plan den un periodo di djes aña i ta kuminsá ku e kareteranan ku mester drecha mas urgente. Ta disidí e urgensia a base di un lista di kriteria ku Gerente di Obranan Públiko, DOW, ta apliká.

E plan ta kla na luna di mart 2023, pero e ora ei mester bai papia ainda di finansiamentu.