ORANJESTAD – Reservanan internashonal, konsistiendo di reservanan ofisial di Banko Sentral i e reservanan di divisa ku bankonan komersial a mantené, a oumentá ku mas ku 68 mion florin kompará ku fin di dezèmber 2021.

E reservanan ofisial a baha ku 1,3 mion florin, mientras e reservanan di divisa ku bankonan komersial a mantené a oumentá ku kasi setenta mion florin. E reservanan ofisial i internashonal ta awor respektivamente 2,7 miar i kasi 3,2 miar.

Konservashon di un nivel adekuá di reservanan di divisa ta sumamente esensial pa mantené e tipo di kambio fiho entre florin Arpubano i dòler Merikano.

Den e kaso aki Banko Sentral ta spera ku e reservanan internashonal lo keda ruim riba e mínimo di tres luna ku ta eksihí di pagonan di kuenta koriente.               

Pagonan di kuenta koriente ta entre otro pagonan di importashon, pagonan di interes na invershonistanan di eksterior i transferensianan bankario pa eksterior manera transferensia di fondo di trahadónan strañero. E reservanan ofisial lo por keda dentro di un márgen adekuá.