WILLEMSTAD – Gerente di Komunikashon i Informashon di Kòrsou a desaroyá un plataforma multimedia ku e nòmber Gob. Eiriba ta presentá informashon di gobièrnu via diferente programa. Por bishitá e plataforma aki via e sitio wèb i media sosial di gobièrnu.

E plataforma ta aksesibel tambe via diferente servisionan públiko di gobièrnu i ta kontené un portal interno ku ta spesialmente dediká na empleadonan di gobièrnu.

Algun di e programa- i segmentonan di Gob. ta Gobièrnu na Plaka chikí, dirigí riba gobernashon, Ki bo ke men, un podcast di tópikonan aktual, i Bon pa sa, dirigí riba estadístika di gobièrnu i e servisionan ku gobièrnu ta ofresé.

Tambe tin e programa Mi t’Ámtenar, ku ta mustra e empleadonan di gobièrnu i nan trabou durante dia pa haña asina un mihó bista ken e ámtenar ta i kiko su trabou ta enserá.

Por último tin tambe Puntra Fòrti 17, kaminda promé minister lo kontestá preguntanan di komunidat. 

Un otro kambio ku tabata visibel kaba na final di luna di òktober 2022, ta e diseño i e imáhennan nobo di gobièrnu. Lo bai hasi mas uso di ilustrashonnan moderno, kaminda ta kombiná imáhen i teksto pa komuniká mas efisiente.

Pa hasi esaki posibel a invertí den un banko di imáhen lokal ku mas ku 10.000 imáhen, yamá GovStock. E banko di imáhen aki ta pa uso interno.