WILLEMSTAD – Esun ku no a deshasí di e konstrukshon òf e stèlashi ku e mes a konstruí kantu di ruta di karnaval promé ku djadumingu awor 3’or di mèrdia, lo no haña pèrmit otro aña. Esei gobièrnu di Korsou ta informá den un deklarashon di prensa.

Ta trata di stèlashinan riba kaminda públiko, pero tambe konstrukshonnan ku a konstruí riba tereno privá. Materialnan ku no ta uza mas mester tira afó na un manera legal òf tuma nan bèk. Mester limpia e sitio kaminda a konstruí konstrukshonnan pa Karnaval kompletamente.

Tim di Prekario ta konsehá doñonan di pèrmit pa dokumentá i saka pòtrèt di kaminda nan a limpia kompletamente. Por usa esakinan pa mustra otro aña ku e aña aki a deshasí di tur kos i limpia e lugá kompletamente.