WILLEMSTAD – Ta invitá un i tur na Kòrsou pa partisipá otro siman djabièrnè i djasabra ku CURA DOET, e akshon boluntario mas grandi di Kòrsou. E aña aki ta di djes biaha ku partisipantenan ta bai hisa manganan di kamisa i purba di hasi e diferensia.

Dos dia largu tantu grupo- komo empresanan ta bai hasi algu pa un otro. Ku mas ku 250 proyekto partí rònt Kòrsou organisadó CuraCares ta buskando e aña aki atrobe mas ku 4.500 boluntario pa huntu hasi  organisashonnan sosial, institutonan i klupnan na Kòrsou un tiki mas bunita, mihó i kontentu.

Por inskribí ainda i e ta fásil. Bo mes por skohe un proyekto apropiá riba www.curadoet.com.

Tin diferente kas di kuido i kas di ansiano, manera Stichting Huize Tabita i Sentro di Aktividat 60+ ku ta hasi uzo di e dianan aki pa organisá un dia plasentero pa e grandinan.

Skolnan manera VSBO Sint Jozef i Skol Emmy Berthold ta uza CURA DOET pa renobá nan plenchinan di skol, planta mata òf traha un mural inspirativo pa e studiantenan.