DEN HAAG – E partido PVV ke introdusí tantu na Hulanda komo riba e islanan Boneiru, Saba i Sint Eustatius un tarifa di BTW sero pa produktonan alimentisio. E Lei kompranan pagabel ta eksigí un kambio di e Lei di Impuesto di Benta i e Lei di Impuesto BES. Na islanan BES BTW yama: ABB, Algemene Bestedingsbelasting.

Esnan ku a tuma e inisiativo ke baha e preis riba tur produkto alimentisio poniendo e BTW na sero porshento. “Pakiko gobièrnu mester gana hopi plaka riba lomba di hendenan ku hamber, ku no por paga nan kompranan?” Esei no tin splikashon segun PVV.

Poniendo BTW riba kompranan na sero porshento, tur kos ta bira den un tiro nuebe porshento mas barata, partido PVV ta razoná. Na Boneiru e tarifa ei ta seis porshento i na Saba i Sint Eustatius tres porshento.

Mientrastantu e proposishon di e inisiativa ta serka Raad van State. Despues di a risibí e konseho i e reakshon riba esei di esnan ku a tuma e inisiativa, Tweede Kamer lo trata e kontenido di e propisishon di lei. 

E lei aki ta destiná komo instrumento temporal pa silensiá e konsekuensianan di e inflashon haltu mas tantu ku ta posibel pa siudadanonan i ta ekspirá djesdos luna despues ku  e lei a drenta na vigor.