WILLEMSTAD – Bario Nieuw Nederland ta haña un mural spesial kaminda e antesedentenan di e bario ta para sentral. E proyekto ta parti di CuraDoet ku ta tuma lugá rònt Kòrsou e wikènt aki. Artista i muralista Aemy Felicia a pinta e mural. 

Djasabra 11 di mart Etienne La Cruz, ku 77 aña pasá tabata biba den e bario, ta desvelá e mural. E inisiadónan di e proyekto ta Beyond Kultura Events Foundation di Sint Maarten i Changing Habbits Foundation di Kòrsou.

Loekie Morales, presidente di Beyond Kultura Events Foundation, ta bisa ku e mural ta e promé den un seri di mural ku Beyond Kultura ke bai pone den i rònt Willemstad.

“E mural ta simbolisá e forsa di nos hendenan muhé komo edukadó di nos famianan, ku norma i balornan positivo. Nan ta keda hunga un papel hopi importante den edukashon di nos komunidat”, segun Morales.

E señora riba e mural ta Adelaida Morales, ku a biba te su 102 aña den Nieuw Nederland i a lanta seis yu. El a mira alrededor di 35 ñetu den e bario. E ta konosí pa su dicho: ‘Esun ku hasi bon, bon ta p’e’.