ORANJESTAD – Aktivista di medioambiente Anouk Balentina a bolbe hasi un yamada serka wes na Oranjestad pa enkargá Ministerio Públiko pa persiguí gobièrnu di Aruba den kaso di Parkietenbos.

Aña pasá tambe esei a sosodé, pero e tempu ei e gobièrnu di Evelyn Wever-Croes a haña tempu pa stòp sushamentu di medioambiente riba e lèntfel. Ministerio Públiko a sugerí pa wak 1 di yanüari atrobe si gobièrnu a uza e espasio ei pa pone un fin na sushamentu di medioambiente den i rondó di lèntfel Parkietenbos, inkluso e insineradó ku ta establesé einan.

Mientrastantu Ministerio Públiko ta pone e denunsianan di echonan kastigabel un banda. No a aseptá denunsianan nobo, apesar di e rekonosimentu ku a kometé echonan kastigabel.

Segun Balentina e ministernan responsabel no a hasi absolutamente nada pa resolvé e molèster i violashonnan di derechonan humano na Parkietenbos.

Seramentu di e lèntfel 1 di yanüari ta nifiká ku no ta basha sushi nobo mas, pero for di punto di bista di  empresa tur kos ta sigui gewon, segun Balentina.

“E insineradó ta kima kasi 24/7 e lodo di awa sushi di e planta di tratamentu di awa sushi defekto na Bubali”. Segun Balentina kontra tur regla- i pèrmitnan.

Apesar di e siere, ku regularidat e lèntfel ta na kandela ku hopi molèster di huma pa e habitantenan den besindario.

Fecha límite

Balentina ta bisa ku dos luna despues di e momento di evaluashon Ministerio Públiko ta keda hopi ketu. Pa e motibu aki e aktivista di medioambiente ta hasi di nobo un yamada riba korte na Oranjestad pa ordená Ministerio Públiko pa persiguí.