KRALENDIJK- For di siman pasá por nota ku e keintura di elekshon a kuminsá hasi su entrada, ku mas i mas tiramentu di lodo entre e partidonan polítiko i mas i mas rumor ku ta wòrdu distribuí via medionan sosial. 

Fin di siman pasá por a tuma nota di un karta ku lo indiká ku diputado Hennyson Thielman lo mester a benefisiá diferente aliado di partido UPB ku kontraktonan lukrativo pa trabou termporal pa Entidat Públiko Boneiru (UPB). E karta no solamente a menshoná nòmber, pero tambe e montantenan ku lo a wòrdu pagá na e personanan aki.

Banda di esei, último dianan por a nota tambe diferente rumor ku lo indiká ku lider di partido demokrat lo ta pèrdí sin ku niun hende sa na unda e ta. Tambe por a nota diferente rumor ta kore tokante supuesto ekseso di uso di droga a alkohòl di e lider di MPB. Pa pone un fin na e rumornan aki, Abraham a bai asina leu di a bai hasi un tèst di alkohòl i droga, i a parti e resultado negativo via entre otro WhatsApp i otro medionan sosial. 

Kuenta di restorant

Djadumingu por a tuma nota di un rumor nobo, e biaha aki tokante lider anterior di MPB, Elvis Tjin Asjoe, ku ta tilda esaki di tin un kuenta habrí pa mas di un aña na un restorant i bar lokal pa mas di 5000 dòler, sin ku e ke lo ke paga esaki. 

Ounke den seno polítiko ta parse un deporte ken por saka rumor mas dañiño tokante kontrikante polítiko, hopi votadó ta ekspresá un desgusto pa loke ta pasando. “Ché, hopi fies e kosnan aki. Anto ta e hendenan aki tin ku bai representá nos poblashon”, asina un señora a ekspresá su mes despues di a skucha e último rumor.