WILLEMSTAD – Empresarionan a haña un luna di suspenshon pa manda resúmen di salario elektróniko pa servisio di impuesto. Normalmente mester entregá esei promé ku 1 di aprel, pero e kore kore  riba number di identifikashon úniko (cribnummer),  ta asina haltu, ku servisio di impuesto no por realisá e petishon pa e fecha ei.

E kore kore ta debí na e echo ku for di e aña aki empresarionan ta obligá pa menshoná un number di identifikashon úniko pa kada empleado riba e spesifikashon di suèldu. Esei ta un spesifikashon di un empresa di tur empleado ku ta risibí suèldu. Esaki ta pa promé biaha. 

Ta p’esei ku a disidí pa alargá e último dia di entrega di e resúmen di salario elektróniko 2022 te djabièrnè 28 di aprel. Servisio di impuesto ta hasiendo aktualmente nan máksimo esfuerso pa prosesá e petishonnan ku nan a risibí mas lihé ku ta posibel.

Entre otro ta kreando numbernan di identifikashon úniko  outomátikamente pa tur residente ku ainda no tin un number di identifikashon úniko.

Segun servisio di impuesto aktualmente hopi siudadano ta hasiendo un petishon pa un number di identifikashon úniko nobo, mientras nan tin un kaba. E pagadónan di impuesto por kontrolá esei fásil, pasobra riba tur korespondensia di servisio di impuesto e number di identifikashon úniko ta pará.

For di servisio 

Diferente doño di trabou a duna di konosé ku nan no tin number di identifikashon úniko di personal ku a bandoná servisio durante 2022. Ta trahando riba un solushon pa esaki awor aki.

Ta konsehá doñonan di trabou pa kompletá adelantá e numbernan di identifikashon úniko pa empleadonan ku tabata den servisio te ku 31 di dezèmber 2022,

Servisio di impuesto por último ta urgi doñonan di trabou pa pone den nan atministrashon di suèldu e number di identifikashon úniko  pa tur empleado ku ta drenta servisio.

E obligashon pa pone un number di identifikashon úniko  den e resúmen di salario elektróniko lo keda eksistí. Ta posibel pa un no-residente tambe hasi petishon pa un number di identifikashon úniko.

Den e kuadro aki pa servisio di impuesto nashonalidat òf státus di residensia di un trahadó no ta relevante. Ta fasilitá tur hende pa paga impuesto i preminan ku nan debe.