ORANJESTAD – Gerente di Aviashon Aruba i Gerensia di Aviashon di Reino Uní a firma un kombenio, ku ta regulá derechonan pa kompanianan di aviashon riba e ruta entre Aruba i Reino Uní i visevèrsa.

E kombenio ta basá riba open skies-policy,  un maneho habrí sin limitashon pa loke ta trata e kapasidat òf frekuensia di buelonan. Esaki ta e maneho mas efisiente pa maksimalisá e tranporte aéreo.

British Airways

E kombenio ta nesesario pasobra for di 26 di mart British Airways ta bai bula dos biaha pa siman di London Gatick pa Aruba. Ta referí na un buelo di djaweps i un buelo di djadumingu, ku un parada na Antigua.

Despues di e kombenio bilateral e outoridatnan Britániko lo start e proseso pa kambia e kombenio den un tratado.

Esaki ta promé biaha ku British Airways ta añadí Aruba den su ret di destinashonnan. E último biaha ku un avion di British Airways a bula pa Aruba tabata 35 aña pasá ora un Concorde a yega Aruba i a keda solamente un dia, pero esaki no tabata un buelo planiá.