WILLEMSTAD – Curaçao Airport Partners ta riba e lista di Routes Americas Awards 2023. CAP ta bisa ku aki ta trata di un premio prestigioso ku ta rekonosé ekselensia den desaroyo di ruta entre kompanianan di aviashon, aeropuertonan i destinashonnan den region Merikano. Curaçao International Airport ta nominá den e kategoria bou di kuater mion pasahero.

Routes Americas 2023 awards, ku ta tuma lugá djarason 22 di mart  durante un seremonia na Network Evening, konosé tambe kategorianan di aeropuerto ku fluho di pasahero mas grandi i destinashonnan. St. Vincent,  Grenadines Tourism Authority i Jamaica tambe ta nominá.

Aeropuerto di Kòrsou ta e úniko aeropuerto den Karibe ku ta nominá den e kategoria bou di kuater mion pasahero i mester kompetí ku Idaho Falls Regional Airport, Rhode Island Green International Airport i Tulsa International Airport.

Plataforma

Routes Americas 2023 ta un evento di aviashon den region Merikano i ta trese profeshonalnan senior di industria di kompanianan di aviashon, aeropuerto- i destinashonnan huntu. E ta ofresé un plataforma pa pone relashonnan entre un públiko kualifiká di personanan responsabel pa tomo di desishon riba tereno di desaroyo aéreo den henter e region.

Despues di 2020 ta promé biaha ku Routes Americas 2023 Awards ta bèk.