ORANJESTAD – Fundacion Parke Nacional Aruba ta start un proyekto medio ambiente kant’i kosta na Aruba den koperashon ku Wageningen University & Research, ScubbleBubbles Foundation i Universidat di Aruba.

E proyekto di prueba aki ta ko-finansiá pa  Union Europeo i Wageningen University & Research. E meta ta pa realisá un rekuperashon práktiko di Aruba su refnan di koral i mangrovenan. E proyekto tin un durashon di djessinku luna.

E proyekto aki ta dirigí entre otro riba rekuperashon di ref di koral, rekuperashon di mangrove i konsientisashon di komunidat di Aruba pa e medio ambiente kant’i kosta.

Na 2018 Aruba a emití Parke Marino Aruba, manehá pa Fundacion Parke Nacional Aruba. Aktualmente e isla ta trahando pa stipulá un parti mas grandi di su áreanan kant’i kosta komo zona húmedo protehá bou di e Tratado di Ramsar, sostené den esaki pa ngo’s lokal i organisashonnan sosio.

Durante di e ehekushon i despues di a terminá ta integrá e proyekto aki den e maneho di Parke Marino Aruba pa garantisá kontinuidat i efektonan permanente pa e isla.

Fundacion Parke Nacional Aruba ta manehá Parke Marino Aruba ku ta konsistí di kuater Área Marítimo Protehá, kualnan ta Arikok, Sero Colorado, Mangel Halto i Oranjestad. 

E áreanan marítimo protehá ta alohá un biodiversidat balioso, entre nan hopi sorto endémiko, kasi tur mangrove di e isla, áreanan di yerba di laman, refnan di koral, islanan di ref chikitu pa reprodusí stern, i lugá di wèrp i kome pa dolfein, turtuga i tribon.