KRALENDIJK- E partidonan M21 i Demokrat a kaba di firma un akuerdo di kooperashon di frakshon. E dos partidonan ta topa otro riba diferente punto pa gobernashon i ta dispuesto pa kolaborá ku otro pa fiha un fundeshi sólido. 

E kambio ku Boneiru a indiká durante elekshon di 15 di mart último ta opvio, i huntu M21 i Demokrat por medio di e akuerdo ta dispuesto pa traha pa Boneiru. “Nos mester laga interes personal i polítiko un banda, i pone nos pueblo na promé lugá. Boneiru a bisa kla i raspa ku ta Demokrat nan ke, i no por ninga nan esaki. Mester respetá Demokrasia! Huntu ku nos kolega ku tabata ku nos den oposishon nos ta kla pa pone nos hendenan i nesesidat na promé lugá”, asina líder de Partido Demokrat, Clark Abraham, a bisa. 

Diferente

“M21 a bisa for di un prinsipio ku Boneiru meresé algu diferente, resultado di elekshon ta mustra ku nos Bonerianonan no ta satisfecho i pa e motibu aki nos ta dispuesto i habri pa sostené Demokrat durante un posibel koalishon. M21 ta mira hopi puntonan similar den e programanan di M21 i Demokrat. Laga nos duna espasio i respetá resultado, i ta e diferensia dor di empoderá i sostené e eskoho di nos pueblo”, asina líder polítiko di M21, Daisy Coffie a bisa.