WILLEMSTAD – E anterior edifisio di Casa Moderna den kurason di Punda a bira sede di Kas di Teater, sede di Teatro Bulabanda.

E anterior Casa Moderna den Punda ta ideal pa e Kas di Teater. Situá den kurason di Punda, e ta pas kompletamente den e ambiente general di e distrito di nogoshi, e bida moderno den e sentro di siudat i e historia artístiko di renaissance

Katalisadó

Teatro Bulabanda ta mira su mes komo katalisadó pa desaroyo di e hubentut talentoso di Kòrsou.

Un parti importante di e trabou di e teater ta pa fasilitá nan desaroyo komo artista i eskritor, ku e intenshon pa krea siudadanonan mòndu ku tin nan destino den nan propio man, segun un deklarashon di prensa.

Segun Teatro Bulabanda teater no mester ta solamente un instrumento pa entretené, pero e mester fasilitá diskushonnan tambe, maske kon difísil e tópiko por ta.

E pilá di e aserkamentu inovativo di konstrukshon nashonal ta e Kas di Teater nobo. Hóbennan ku ke perfekshoná nan talentonan den nan tempu liber por akudí einan. Teatro Bulabanda ta duna asistensia tambe na organisashonnan ku ta atendé ku hóben adulto ku tin problema ku enseñansa, mamanan hóben soltero òf hóbennan den rehabilitashon.

Albert Schoobaar, direktor artístiko di Teatro Bulabanda ta remarká ku Kas di Teater – pa medio di drama i teater – a krea un ambiente motivante pa personanan hóben pa engrandesé nan kuriosidat, stimulá nan imaginashon i pensamentu krítiko.