KRALENDIJK- Den un deklarashon pa prensa ku a emetí djadumingo anochi lat, Movementu di Pueblo di Pueblo a deskribí partido Demokrat komo ‘arogante’ i alabes a konfirmá ku e partido awor aki ta enfokando riba negosashon ku UPB.

Den nan deklarashon MPB ta desmentí ku asta promé ku elekshon tabata tin akuerdo kaba pa sigui ku e mesun koalishon. “Personalmente ami mes tabata mas inkliná pa traha ku Partido Demokrat pero di e manera ku nos a keda tratá durante e reunion mi a sinti ku no ta tuma nos komo MPB komo un opshon serio pa sinta kuné pero mas bien un spare tire”, asina Din Domacassé ta ekspresá su mes den e komunikado di djadumingo anochi.

Konklushon

Lider di MPB, Hennyson Thielman ta konfirmá ku e partido blou a yega na desishon pa sigui negoshá ku UPB. “Despues di a evaluá e reunion ku DP i tambe esun ku UPB a reuní ku tur miembro di partido riba lista i nos a yega na e konklushon, ku nos lo sigui papia ku UPB, komo un partner igual i pa stabilidat di gobernashon  pa purba yega na un akuerdo di koalishon”, segun Thielman a bisa.

Den wikent tabata tin vários rumor ta kore ku a yega na akuerdo ku otro kaba, i ku Ramonsito Booi i James Kroon lo a bira diputado nobo pa UPB den un koalishon nobo ku MPB. Esaki despues a wòrdu desmentí, bisando ku tabata un ‘joke’ di 1 aprel.

Falta di boluntat

Di otro banda partido Demokrat, via lider di partido Clark Abraha a bisa for di siman pasá di sinti un falta di boluntdat serka ámbos UPB i MPB pa negoshá di forma serio tokante formashon di un koalishon nobo. “Kada bes ta pone enfasís riba yen kos di prosedura. Pero te ainda no a papia riba ningun tópiko serio i tin ku kuminsá teme ku ni MPB, ni UPB ta seriamentu interesá pa traha huntu ku Demokrat, ku lógikamente ta algu di lamentá si mira resultado di elekshon”, asina Abraham a bisa for di siman pasá den komberashon ku Awor.nu.

Sinembargo awor DP ta wòrdu tildá di loke ta wòrdu deskribí komo ‘arogansia’. Den fin di siman tras di lomba ya riba medionan sosial por a skucha mesun tipo di komentario for di simpatisantenan di MPB.