KRALENDIJK- E partidonan UPB i MPB den un deklarashon konhunto djaluna atardi ta skibi ku segun nan, e komunidat boneriano ta mihó sirbí ku stabilidat i kontinuidat. 

“E partidonan pa e motibu akí a tuma desishon di hiba den e dianan binidero kombersashonnan tokante kontinuashon di e aktual koalishon. Esaki seguramente no ta nifiká ku e partidonan lo sigui riba e mesun forma. E negosiashonnan pa alkansá un akuerdo di koalishon nobo, basá riba loke a menshoná aki dilanti, ta bai kuminsá awor”, asina tin skibí den e deklarashon.

Segun e partidonan ta bisa, e siman ku a kaba e partidonan a hiba un análisis profundo i krítiko di e maneho ku a hiba den e periodo di gobernashon tras di lomba, pa por identifiká kaminda e maneho tabatin éksito, pero tambe pa haña klaridat na kua puntonan di mehoransa mester bai traha. Tambe a identifiká puntonan problemátiko ku den ehekushon a krea frenamentu.

“Na entrada di e koalishon na 2019 a enfoká riba stabilidat. For di 2010 tabatin hopi kambio di gobernashon ku tabatin un efekto negativo riba e konfiansa serka partidonan lokal manera organisashon di dunadó di trabou i sindikalismo, pero tambe di parti di ‘Den Haag’. E relashonnan gubernamental ku ministerionan ku a mehorá, a kontribuí na medidanan konkreto pa kombatí pobresa i na promové un trato di igualdat”.

Segun e partidonan, ku ya ta formando koalisahon, nan no tin e intenshon di bai kai sinta ku satisfakshon riba nan asientonan. “Al kontrario, en bèrdat tin un perspektiva riba introdukshon di un mínimo sosial, pero ta importante pa sigui enfatisá riba su urgensia, serka e ministerionan. Esaki ta konta tambe pa e adaptashon di lei ku regulashon ku a keda atras for di tempu di Antia Hulandes. Ku modernisashon di esakinan por eliminá hopi burokrasia ku ta stroba e gobernashon desisivo i e forsa di implementashon rápido”.

Idiologia

UPB i MPB ta bisa tambe ku a konstatá ku entre e partidonan akí, ku representashon den Konseho Insular, no tin diferensianan ideológiko grandi. Ámbos konosé nan prioridat pa halsa e bienestar di e poblashon, gobièrnu íntegro, bibienda sosial, mehorashon di infrastruktura, protekshon di naturalesa i mantenshon di e propio karakter di Boneiru. Pa traha ku éksito riba esakinan un gobièrnu stabil ta di gran importansia, tambe ku bista riba e disponibilidat di e ministerionan pa invertí den Boneiru.

“Ku bista riba e kontinuashon di e koalishon aktual ta aktua konforme e resultado di e elekshon. Si hopi biaha ta haña ku e koalishon na mando mester entregá asiento, e koalishon di UPB/MPB a mantené su 5 asiento. E dianan binidero e partidonan ta traha riba nan vishon i puntonan di lansa pa e periodo di gobernashon benidero ku e speransa ku pa fin di siman binidero por presentá un konsepto di akuerdo. UPB i MPB a palabrá ku lo stipulá un programa di gobernashon definitivo despues di a haña input di komunidat”, asina por lesa den karta ku a wòrdu mandá na nòmber di Hennyson Thielman i James Kroon.