DEN HAAG – Kòrsou, Aruba i Sint Maarten ta haña te 2027 un 120 mion euro di Hulanda pa realisá reformashon den e sektor públiko.

Promé gabinete Hulandes tabatin intenshon pa lanta un órgano atministrativo apart bou di e nòmber COHO ku lo mester a tene supervishon riba e reformashonnan, pero a bini hopi krítika di e islanan pa e plan ei. Nan a haña ku di e manera aki Hulanda lo a imponé reformashonnan.

Kòrsou, Aruba i Sint Maarten ta komprometé nan mes pa kuater aña pa traha na ehekushon di e reformashonnan i Hulanda ta bai duna asistensia ku hende i rekurso.

E reformashonnan ta primeramente responsabilidat di e islanan Karibense. E “Organisashon di Trabou Temporal” eksistente di e ministerio di Asuntunan Interior ta guia i sostené for di Den Haag.

Segun Dick Drayer, e koresponsal di NOS den e área di Karibe, e eskoho pa un areglo asina òf un konsenso Lei di Reino ta mésun kos i básikamente no ta kambia nada, solamente ku e kòntròl di e reformashonnan ta serka e islanan.

“E gobièrnunan di e islanan ke bisa nan pueblo ku kara na laira ku nan ta dirigí tur kos. Hulanda ke sa sigur ku ta gasta e euronan ku nan ta manda na un manera responsabel. E Lei di Reino di e anterior sekretario di estado Knops no tabata duna òf kasi nada di espasio na e paisnan pa nan mes bira doño di nan problemanan. E areglo di Van Huffelen si ta hasi esei, pero no ta kambia nada na e programa di reformashon.”

Segun Drayer Hulanda por disidí ainda pa no manda sèn mas si Den Haag no ta kontentu ku e manera ku e doñonan ta resolvé e problema.

“E pregunta grandi ta keda si Aruba, Kòrsou i Sint-Maarten aki kuater aña lo ta mas resistente i por enfrentá un krísis manera corona. E areglo ku a akordá awe tampoko no ta duna e garantia ei. E realidat riba e islanan ta hopi biaha mas desafiante ku si bo a pone tur e bon intenshonnan huntu. Pero e tono korekto ta duna mas espasio pa traha, segun Drayer.