WILLEMSTAD – Algun aña kaba ta organisá dia di Liberashon 5 di mei den henter Reino e Senanan di Libertat/Freedom Meals. Un i tur por organisá un Sena di Libertat. Grandi i chikitu, ku kosnan di boka dushi òf mesa altu kulinario. Tin kumindanan den tur forma i midí. E esensia di un Sena di Libertat ta un enkuentro partikular sintá na mesa, unda invitadonan ta papia tokante libertat i falta di libertat: temanan ku por lo general no ta tur dia ta pensa riba dje i ku e Dia di Liberashon por pone atenshon na dje.

E Sena di Libertat konosé vários tipo di manifestashon.  Na un banda ta bini huntu pa kome i topa ku otro. Na e otr’un banda  bo ta tende un testimonio di un persona ku a pasa personalmente den e guera; un otro sena hustamente ta kontené presentashon di músikonan ku ta kanta tokante libertat. Pero ún kos sí na tur e senanan ta debatí tokante pas i libertat.

Aña pasá a organisá 31 sena riba  nos islanan bou di e nòmber Freedom Meals.

Na tur ta tin mas ku 1000 kuminda den henter Reino. Hopi hende a sinta huntu na mesa i a kòmbersá ku otro tokante e balor di pas i libertat. Nos islanan no konosé e tradishon di selebrashon riba 5 di mei, simplemente pasobra nunka nos islanan no a wòrdu okupá pues tampoko a eksperiensiá liberashon. Sinembargo tòg nos islananan tabata den guera i 180 antiano a pèrdè nan bida den guera. E miedu pa e bombardeonan for di supmarinonan riba nos islanan tabata palpabel i nos habitantenan despues di bahada di solo mester a mantené nan kasnan sukú. Si bo tende historia di testigunan okular, tur esakinan ta tin un impakto grandi riba nan bida.

Pero e tema di libertat i pas tin hopi mas ángulo di atenshon ku ta bal menshoná. Banda di e guera aktual na Europa, ku tin hopi hende okupá, e tema di libertat naturalmente tambe ta profundamente mará i ankrá den nos historia kolonial i esun di sklabitut. Pero tambe ta tin partisipantenan ku temanan ménos pisá sinembargo mashá impaktante. Nan a trese dilanti den kòmbersashon kon plantamentu di berdura a trese libertat pa nan. Tur hende por yena esaki manera nan ta haña esaki balioso.

‘Nos ta spera ku lo bini diferente formanan kreativo pa trese hende huntu pa dialogá’ segun Anja van Bergen, e organisadó tras di e ‘Freedom Meals’ den Caribe. ‘ Nos a lansa un wèpsait karibense i a abri un página di facebook, ku tur informashon tokante di e Freedom Meals riba e islanan i kon por partisipá na esakinan’ Anja ta invitá tur hende pa partisipá i organisá un Freedom Meal porehèmpel pa bo bario, koleganan, organisashon òf grupo di amigu.

‘Pero bo no tin nodi di hasi tur kos bo mes. Bo ta haña sosten pa organisá un Freedom Meal serka kòki London Loy ku un sòpi sukulento, un glas Freedom Meal pa kada partisipante i karchinan di diálogo. Un Sena di Libertat ku sòpi maishi speshal ku koko i batata dushi.

Bo por haña sòpi den bleki pa kada partisipante, pero klaro ku bo mes tambe por traha un sòpi’ Anja ta indiká. ‘ Nos ta trese e karchinan di diálogo pa yuda tene e kòmbersashonnan tokante Pas i Libertat. ‘Si bo ta deseá di hasi uso di dokumentalnan kòrtiku tokante di testigunan karibense i imágennan históriko òf te asta ke skucha podcastnan tokante libertat  porehèmpel ku Tania Kross, esei tambe ta posibel. Por haña tur informashon riba nos wèpsait. Por registrá te dia 15 di aprèl. Nos ta spera ku hopi ta esnan ku lo sinti nan mes inspirá pa organisá un Freedom Meal.

freedom-meals.com