ORANJESTAD – Aruba ta na kaminda pa realisá e proyekto Aruba Hydrogen Valley. Esei gobièrnu di Evelyn Wever-Croes ta bisa. Nan ta spera ku e isla lo destaká ku esaki riba diferente área di energia den Karibe.

Ku lantamentu di Aruba Hydrogen Valley Aruba lo ta e promé isla Karibense ku un propio fábrika hidrógeno ku nan ta yama tambe un elektrolisadó.

Segun un deklarashon di prensa di gobièrnu Aruba Hydrogen Valley mester kontribuí inmediatamente na un medioambiente mas limpi i ku e isla por bira e promé eksportadó den área Karibense di hidrógeno den region.

Gobièrnu ta spera tambe ku e fábrika nobo na San Nicolas, riba e tereno bieu di refineria Valerio, lo kondusí na empleo i un ‘spin-off’ ekonómiko grandi pa San Nicolas en partikular i un pilá ekonómiko pa Aruba en general.

Un otro stap ku gobièrnu di Aruba ta tuma ta ehekushon di e proyekto EAGLE LNG. E intenshon ta ku e empresa di gobièrnu WEB Aruba NV lo eliminá gradualmente e uzo di gasoil pisá i ta kambia pa gas natural den e próksimo trinta lunanan.

Ademas a start un proseso di subasta pa ekspanshon di e parke di molina na Rincon. Na luna di yüni ta tuma e desishon final pa kua empresa ta skohe pa realisá e ekspanshon di e parke di molina aki.