WILLEMSTAD – A dokumentá historia i patrimonio di e bario Nieuw Nederland komo promé den un seri di dokumental bou di e título Herensia ta Awe.

Den e dokumental a analisá kiko e relashon ta entre hende i e patrimonio den su propio ambiente di bida.

E seri ta dediká atenshon na barionan ku a eksperensiá entre otro kambionan urbano pa motibu di un impakto sosial ekonómiko den e último añanan. E pregunta sentral ta si e kambionan ta forma un menasa pa e kultura di bario. Komo pilot a skohe e bario Nieuw Nederland.

Nieuw Nederland

E bario aki for di antaño ta un bario di trahadónan migrante ku ta pará den sombra di desaroyonan den alrededornan di Penstraat. Kuminsamentu di añanan ’50 di siglo pasá tabata biba prinsipalmente migrantenan di e islanan Karibense di abla Ingles den e bario, pero hendenan lokal tambe a bin establesé.

E konosido kas di bleki i kas di palu tabata karakterístika di e bario. E koheshon di e bario ta ankrá den e diferente religionnan di e hendenan. Ta deskribí Nieuw Nederland komo e kurason di Penstraat i Oranjestraat.

Ta konsiderá e bario ainda komo un bario di migrante, ounke e konstelashon a kambia. E generashon di desendientenan di e promé migrantenan t’ei ainda, pero awendia tin un fluho di migrante di abla Spañó.

E proyekto

Herensia ta Awe ta konsistí di vários parti, entre kua un investigashon históriko kultural, kaminda ta duna un deskripshon di orígen di e bario, ken e promé habitantenan tabata i e diferente kambionan ku a tuma lugá den e bario.

A hasi un enkuesta bou di e habitantenan aktual di e bario. Aki ta wak e konstelashon aktual di e bario i kon e habitantenan ta eksperensiá e bario, pero tambe e posibilidatnan i desaroyo sosial ekonómiko ku durante añanan tabatin un impakto riba e bario. 

A finalisá e proyekto ku un produkshon oudiovisual, kaminda habitantenan di e bario tabata na palabra. Pa medio di entrevista- i anekdotanan nan a konta kon nan a lanta den e bario, ken tabata e empresarionan importante den e bario, i kiko nan mes ta konsiderá patrimonio pa nan mes, pero tambe pa e bario.

E proyekto Herensia ta Awe ta un inisiativa di Stichting Nationaal Archeologisch Antropologisch Memoriebeheer, NAAM.