WILLEMSTAD – Entre 2020 i 2022 desempleo a baha di algu mas ku djesnuebe porshento pa algu mas ku djestres porshento na Kòrsou . E desempleo bou di hubentut a baha mas tantu, di mas ku 42 porshento na 2020 pa kasi trinta porshento na 2022. Asina Ofisina Sentral di Estadístika (CBS) ta informá.

Nan a tene un enkuesta bou di kasnan di famia pa midi e desaroyonan resien riba merkado laboral.

Segun CBS e bahada den desempleo ta debí na un oumento di e kantidat di persona ku por traha. Den kasonan apsoluto tin un bahada di 3.407 persona ku ta buska trabou. 

E kantidat total di hóben den e kategoria di djessinku pa bintikuater aña a baha ku kasi 1500 hóben entre 2020 i 2022/2023. 

CBS ta remarká ku ta midi partisipashon na trabou for di djessinku aña i ku hopi hóben entre djessinku i 24 aña ta na skol ainda òf ta siguiendo un kurso, pero ku si ta buskando un djòp.

Ta konsiderá un persona komo desempleá si bo ta buskando trabou aktivo i si bo por kuminsá traha dentro di dos siman.

Trahadónan

E kantidat total di persona ku ta trahando a subi di 57 mil persona den 2020 pa 67 mil persona den 2022, un oumento pues di mas ku 9.500 persona.

Ta nota tambe un bahada den e total di persona ku ta buskando trabou aktivamente. E kantidat aki a baha di djestres mil persona den 2020 pa djes mil persona den 2022.

Segun e definishon internashonal ku CBS ta uza pa por kompará sifranan di Kòrsou ku sifranan di otro pais, por kalifiká un hende komo un persona ku ta buska trabou solamente si e ta buskando aktivamente i si e por kuminsá traha dentro di dos siman ora e haña un trabou.

Sektor laboral

E sektor laboral aktivo na Kòrsou, definí komo e kantidat total di persona ku ta traha huntu ku esnan ku ta buskando trabou, a subi di mas ku setenta mil na 2020 te kasi 77 mil na 2022.

Esaki ta nifiká un oumento di mas ku shete mil. E oumento aki ta debí na un oumento di e kantidat total di persona ku ta traha i un bahada di e kantidat total di persona desempleá. E bahada di persona desempleá ta bini probablemente pasobra un kantidat di persona ku antes no tabata aktivo riba merkado laboral, a kuminsá traha entre 2020 i 2022.

Aklarashon

Na komienso di luna di mei CBS lo saka un publikashon ku análisisnan aklaratorio di e desaroyo di e bahada di e persentahe di desempleo.