WILLEMSTAD – E kompanianan di aviashon Avior i Albatros a duna di konosé di bai bula tambe di Venezuela pa Kòrsou. Esei Marco Leal, direktor di Curaçao Tourism Office ta bisa den e korant Venezolano El Universal.

E no ta menshoná un fecha, pero si ku Avior ke kuminsá ku tres buelo for di Caracas i Albatros tres biaha pa siman for di Las Piedras.

Anteriormente a anunsiá kaba ku Laser Airlines ta kuminsá riba 5 di mei ku un servisio regular di dos biaha pa siman entre Caracas i Willemstad riba dianan djamars i djabièrnè. E reanudashon di e buelo aki ta kai pareu ku e hubileo di 29 aña di e empresa.

Obligashon di visa 

Siudadanonan Venezolano ku ke drenta Kòrsou mester tin un visa ku ta bálido pa tres luna. Turistanan mester tin un buelo di regreso òf un pasashi pa un di tres destinashon, den kaso ku nan ta di transito.

Tambe nan mester mustra un reservashon di hotèl bálido òf un kaminda di keda responsabel. I nan mester tin un montante di 150 dòler ku nan pa kada dia ku nan ke keda Kòrsou.