WILLEMSTAD – Resientemente Kaya Kaya a traspasá e anfiteatro Jopi Hart na asosiashon di doñonan di tienda SKO na Otrabanda. Meta di e anfiteatro ta pa ofresé organisashonnan e posibilidat di hasi uzo di e fasilidatnan ku e teatro ta brinda pa kada presentashon.

Banda di e konosido festival e organisashon di Kaya Kaya ta traha na mehorashon di  infrastruktura di e bario Ser’i Otrabanda. Den e último seis añanan por a mira kambionan eksepshonal den e área di Ser’i Otrabanda Ost i Ser’i Otrabanda Wèst.

Un di e momentunan orguyoso di Kaya Kaya ta e transformashon di e área den Naniestraat den un anfiteatro. Un dia promé ku e festival na 2022 Kaya Kaya a inougurá e anfiteatro i na mes momentu a duna rekonosimentu na Jopi Hart, e íkono di Otrabanda.

Ku e anfiteatro no ta bario di Otrabanda so tin un teatro den aire liber pa kualke un presentashon, pero henter pueblo di Kòrsou. Por ehèmpel pa sine/video, presentashonnan di músika, komedia, i mas. 

E meta di Kaya Kaya ta semper pa yuda organisashonnan eksistente ku atministrashon i mantenshon, manera den e kaso aki di SKO, ku lo atministrá, mantené i supervisá e anfiteatro Jopi Hart. Na momentu ku un di e direktornan di Kaya Kaya i SKO a duna otro un man fuerte a traspasá e anfiteatro ofisial na e asosiashon di doñonan di tienda.