KRALENDIJK- Un ekipo di varios representante di Royal Bank of Canada (RBC) resientemente a bishitá Saba, pa papia di algun keho spesífiko riba servicio di e banko na su klientenan riba e isla.  

E ekipo di RBC tabata konsistí di Country Manager RBC pa Kòrsou i Boneiru, Pierrot Hurtado, i Cheryl Pantophlet-Valies di RBC bank na Saba i St. Maarten.

Un di e punto di doló ta e echo ku RBC te awor ta kobra tarifanan haltu pa transferensia for di otro islanan Hulandes den area di Karibe. Den konsulta ku Banco Sentral di Kòrsou i St. Maarten, ta bai na evitá pa fin di yüni benidero  ku transferensianan for di otro islanan pa Saba ta konsiderá komo transakshonnan internashonal, ku tur e kostunan ku ta bini ku esaki.

Un otro punto di atenshon ta pa manda mas sèn lòs (moneda) pa Saba. Kompanianan spesífikamente tin falta di kambio chikí, sin ku esaki ta disponibel.

Además, e banko ta primintí ku habitantenan di Saba mester por habri un kuenta den un siman, ku presentashon di un identifikashon bálido i un prueba di adres di bida.