WILLEMSTAD – For di luna di yüni Kòrsou lo ta bou di un ‘vergrootglas’ na momentu ku Caribbean Financial Action Task Force, CFATF, bai hasi investigashon di kumplimentu ku normanan internashonal riba tereno di anti-labamentu di plaka i kombatimentu di finansiamentu di terorismo i proliferashon.

E resultadonan di esaki lo ta di sumo importansia pa e reputashon di Kòrsou, segun Curaçao International Financial Services Association, CIFA.

Diferente interesadonan, manera dunadónan di servisio finansiero, mákelar, notario, abogado, distribidónan di material di konstrukshon i representantenan di sektor públiko manera duana, polis i ministerio di Hustisia, mester mustra nan kumplimentu ku normanan internashonal i e impakto di nan akshonnan.

E evaluashon di CFATF finalmente ta husga si ta konsiderá Kòrsou komo un pais ku ta kumpli ku e normanan. Si resultá ku Kòrsou no ta kumpli òf no ta kumpli sufisiente, lo anunsiá esaki públikamente komo un pais ku defisiensia den su kuadro.

‘Lista shinishi” di impuesto-EU

Banda di e evaluashon di CFATF sektor finansiero di Kòrsou ta hañ’é konfrontá ku retonan ku e ‘lista shinishi’ di e impuesto-EU ta trese kuné.

E ‘lista shinishi’ di EU ta referí na un lista di pais i área ku a primintí di traha riba fayonan den nan sistema di impuesto i di kumpli ku prinsipionan di gobernashon di impuesto di Union Europeo, pero ku ainda no a implementá e promesanan aki kompletamente.

“Futuro di e integridat finansiero di Kòrsou ta dependé di nos esfuersonan komun pa trata e evaluashon di CFATF i e ‘lista shinishi’ di impuesto-EU”, Christina Halaby- de Freitas Brás, presidente di e direktiva di CIFA ta bisa.