WILLEMSTAD – Pianista Randal Corsen ta lider artístiko i produktor durante un programa di dos anochi na lanthuis Brakkeput Mei Mei riba djabièrnè 28 di aprel i djasaba 29 di aprel.

E organisashon di Jazz Fest ta bisa ku lo bai regalá e públiko ku ta stima músika crème de la crème di djès lokal na e lanthuis.

E programa ta tuma lugá antisipando e fecha di 30 di aprel ku UNESCO a proklamá komo International Jazz Day. 

Djabièrnè 28 di aprel e anochi ta kuminsá ku e Kuarteta di Eric Calmes, siguí pa un konhunto konsistiendo di entre otro Ronchi Matthew, Lonte Conradus, Stanley Betrian i Hershel Rosario ku kantante Yumarya Grijt. 

Despues ta subi esenario Dibo i Randal Corsen ku lo presentá nan proyekto Müzik sin Barera den tur su fasetanan, inkluso presentashon di e album nobo, pa despues sera e anochi ku vürwèrk muzikal ku La Familia Cubana ku e kantante eksepshonal Mafalda Minguel.

Djasabra 29 di aprel ta kuminsá e anochi ku aktuashon di Chris Wallé su proyekto nobo titulá KrezD 4-tet ku kantante Veanira Reed, siguí pa e Trio Randal Corsen ku  Eric Calmes riba bas i Pernell Saturnino riba perkushon i komplementá pa  Russel ‘Konkie’ Halmeyer riba panchi. 

Despues ta toka turno na Bena Mayó pa sera Jazz Fest 2023 ku e formashon Beter pa Tokadó.