WILLEMSTAD – Sürnam ke bula pa Amsterdam via Kòrsou. Na e momentu aki un delegashon di SLM ta na Kòrsou. E kompania ke uza e isla tambe komo hùb stratégiko pa otro destinashonnan regional, entre kua Miami.

E aerolínea Sürnam Surinam Airways, ta hibando kombersashon ku sektor turístiko di Kòrsou i gobièrnu di Pisas.

SLM ta mira Kòrsou komo partner stratégiko i destinashon pa entamá e strategia di kresementu  di e aerolínea. Pa e motibu ei mester wak e asina yamá libertatnan di aviashon di nobo.

E libertatnan di e transporte aéreo ta un seri di derecho di aviashon ku ta duna e kompanianan di aviashon e previlegio pa drenta e espasio aéreo di un otro pais i aterisá.

Posibel rutanan regional ku tin riba lista di deseo di SLM ta e rutanan Kòrsou-Miami, Kòrsou-Santo Domingo i Kòrsou-Port Au Prince kaminda Surinam Airways  a duna di konosé di ke hasi esaki den etapa.

E prosedimentu den etapa tin di haber ku e echo ku nan ta den e etapa di rekuperashon ainda i pues no ta den posishon pa hasi hopi kos pareu.

Den e promé etapa aki di un koperashon renobá ku Kòrsou a disidí pa antisipando riba e modifikashon di e akuerdo bilateral di firma un memorandum of understanding  pa e ruta Paramaribo-Kòrsou-Miami.