KRALENDIJK- Boneiru komo stashon, i e tim di Air Handling Services Bonaire (AHSB) a logra un rekonosimentu importante den forma di premio pa e mihó stashon di Delta Airlines.

E team di Boneiru a wòrdu skohé for di en total 10 aeropuerto ku ta kai den mesun kategoria ku Boneiru. Iliyanta Lourens di AHSB ta sumamente orguyoso di logro di e tim. “Mi ta hopi kontentu i agresido pa e rekonosimentu aki ku nos a logra, i mi ta agradesido na hinter e team”, asina Lourens a bisa. 

AHSB ta responsabel pa e servisio ku ta duna na tur avion di Delta Airlines ku ta yega Boneiru, i tin hopi aña di eksperensia komo ‘handler’ di diferente airline i spesialmente tambe e diferente aerolíneanan Merikano. 

Handler di avion tin ku sigui hopi entrenamentu pa kumpli ku eksigensianan ku kada aerolinea tin, pa ku nan operashon. Tambe, kompanianan manera AHSB ta wòrdu evaluá kontinuamente pa wak kon na ta skor riba diferent punto, manera amabilidat, puntualidat i e grado den kua nan ta sigui prosedura i regla establesé.