WILLEMSTAD –  Ayera a duna inisio simbóliko pa konstrukshon di The Pyrmont Hotel den Penstraat. Simbóliko, pasobra a kuminsá ku e trabounan di konstrukshon for di komienso di e aña aki. Den e di kuater kuartal di 2025 e hotèl nobo mester ta kla.

The Pyrmont Hotel tin 300 kamber luhoso, inkluso 25 suit históriko luhoso. Tambe ta bini ocho restorant i bar, un sala di baile, un akohida pa mucha i klup pa hóben, un sentro di gimnasia i un sentro di deporte akuátiko i di buseo.

Riba e tereno entre dos establesimentunan ikóniko, e anterior Cerro Bonito i Kas di Pueblo,  ta bini un hotèl luhoso all inclusive bou di maneho di Autograph Collection, un parti spesialisá di e kadena di Marriott. Autograph Collection ta manehá kaba mas ku 200 risòrt luhoso den mundu.

Establesimentunan históriko 

A base di e filosofia Autograph aki ta renobá ámbos establesimentu i inkorporá nan den The Pyrmont Hotel pa laga e patrimonio kultural i históriko sigui biba.

Te ku resien ámbos establesimentu tabata propiedat di e famia prominente lokal Maduro. Den Cerro Bonito, un edifisio neoklásiko segun diseño di e arkitekto Lyon di Corsica, tabata tene antes shounan di gala i soiree privá kantu di laman. Despues el a bira un hotèl. Den e konsepto nobo ta bini un restorant signature bou di e nòmber Cerro Bonito.

Mas aleu den Penstraat nos ta haña e edifisio di Kas di Pueblo – ku famia a duna e nòmber di reina-regente Emma van Waldeck Pyrmont – ku durante añanan tabatin diferente funshon te ora ku na aña 1948 e partido polítiko NVP a kumpr’é i ku el a sirbi komo sede di partido te ku algun desenia atras. Den e plannan di Pyrmont ta añadí aki un sala di baile i un spa luhoso.

Empleo 

E desaroyadó Pen Resort B.V. a kuminsá e aña aki ku e trabounan, ku lo dura 32 luna i lo keda kla den di dos mitar di 2025.

E proyekto lo brinda trabou na 250 trahadó den konstrukshon lokal di diferente disiplina. 

E proyekto ta eksigí un invershon di 87 mion dòler i ora e habrí lo tin alrededor di 350 puesto di trabou dirèkt i indirèkt 150 puesto di trabou.

Ta antisipá ku riba un base anual e hòtèl aki lo atraé alrededor di 30.000 wéspet strañero.