WILLEMSTAD – Aruba, Kòrsou, Sint Maarten i Hulanda a kuminsá ku un programa spesial pa oumentá e éksito di estudio di studiantenan Karibense, A disidi esei kaba na luna di yanüari durante e konsulta anual di kuater pais di Enseñansa, Kultura i Siensia.

Ta kuminsá awor ku desaroyo di e tres prioridatnan ku a identifiká. Ta bai instituí un beka di reino móbil, un beka pa studiantenan di mbo, hbo i wo pa ámplia e mobilidat entre e islanan nan ku nan i ku Hulanda. 

Ta bini un Caribbean academic foundation year, un programa pa prepará studiantenan Karibense bon riba un formashon adishonal. A traha palabrashon pa mehorá e konekshon entre enseñansa i merkado laboral.

Interkambio di studiante 

Un studiante di Aruba, Curaçao, Sint Maarten, Bonaire, Saba òf Sint Eustastius por bai awor ku un beka di Erasmus+ tur pais Europeo, ku eksepshon di esnan di Hulanda. E kuater paisnan ke kambia e situashon aki.

Interkambio temporal mutuo ta kondusí na mas komprenshon i apresio. Pesei a palabrá pa yega na un programa nobo di mobilidat segun ehèmpel di Erasmus+ pa tur studiante den mbo, hbo i wo dentro di Reino.

E beka di reino nobo mester hasi mobilidat posibel riba e nivelnan aki entre e islanan nan ku nan i tambe ku Hulanda. E mobilidat aki ta konta tambe pa stazje. Ta e intenshon pa hasi e montantenan di beka komparabel ku e programa di Erasmus, teniendo kuenta tambe ku studiantenan ku ménos posibilidat finansiero.

Prepará

Pa hopi studiante Karibense e transferensia pa edukashon superior ta resultá muchu grandi. Pa  prepará nan mihó riba un edukashon riba hbo i universidat e kuater paisnan ke agrupá inisiativanan eksistente pa un pre-academic year i sigui desaroyá den un ‘Caribbean academic orientation year’.

E programa di preparashon aki di un aña ta kontené tantu abilidatnan akadémiko komo e bida komo studiante. E partisipashon ta ku e tres universidatnan den Karibe ta ofresé un programa komun i kaminda esei ta deseabel den koperashon ku fakultat- i universidatnan Hulandes

Riba término largu mester drecha enseñansa sekundario mes si ta trata e konekshon ku enseñansa superior.

Finalmente e ministernan a kumbiní ku ta bai hasi investigashon kon ta mehorá e konekshon entre enseñansa i merkado laboral.