DEN HAAG – E estatua di Tula ‘sunú’ ku tabata kontroversial i ku Toos Hagenaars a traha, ta bolbe Kòrsou despues di mei siglo. Despues ku no a logra pa haña un lugá den añanan setenta di siglo pasá na Kòrsou, e estatuá a terminá den un lots di munisipio di Oost-Groningen na Hulanda.

Den e obra ‘Tula, een beeld van de slavernij’ reportero Lodewijk Dros ta ilustrá e historia remarkabel di e estatua. Na aña 1973 e artista blanku Toos Hagenaar (1932), ku e tempu ei tabata biba na Kòrsou, a traha e obra di arte. Ku su imáhen e kier a lanta un monumento pa Tula, e lider di e rebelion di katibu riba e isla ku a basha abou kruelmente na aña 1795.

Artista blanku 

Na prinsipio na aña 1973 e entusiasmo pa e estatua tabata grandi, pero rápidamente a bòltu pa motibu di dos opheshon: un artista blanku a traha un estatua ku ta representá un hòmber pretu sunú.

Despues e estatua a move huntu ku e produktor pa Winschoten pa finalmente terminá den un lots munisipal di Oldambt. Riba 25 di aprel Toos Hagenaars, ku mientras tantu tin 90 aña, a anunsiá ku e ke regalá pueblo di Korsou e estatua.

Brasa 

E aktivista Afro-Kurasoleño Gibi Bacilio ku for di 1979 ta un defensor pa rehabilitashon di  Tula, ta reakshoná positivo. “Mi ta brasa e estatua. Nos ta bai haña un bon destinashon p’e,” el a bisa durante di presentashon di e buki  ‘Tula, een beeld van de slavernij’.

For di Willemstad Gibi Bacilio ta reakshoná emoshoná: “Gustosamente na nòmber di e personanan ku pa desenas di aña ta bringa pa emansipashon di e poblashon di koló, mi ta aseptá e oferta di Toos Hagenaars. I no solamente e estatua, pero Toos tambe. Komo hende muhé blanku el a hasi esfuerso den añanan setenta pa emansipashon. Mi ta brasa Toos i su Tula.”

Lugá

Basilio tin kaba diferente opshon kaminda por pone e estatua. E promé ta un sitio históriko kaminda na 1795 a torturá i mata Tula, entre Fort Amsterdam i Waterfortbogen. E otro ta un sitio polítiko, e patio di Fort Amsterdam, ku na un banda palasio di gobernadó i na otro banda Konseho di Minister, di manera ku ta rekordá polítikonan tur dia riba e lucha di Tula.