WILLEMSTAD – Resientemente Vereniging Bedrijfsleven Curaçao (VBC), Maduro & Curiel’s Bank (MCB) i Deloitte a establesé un tipo di kolaborashon pa desaroyá e forsa di traha ku dato i interkambiá dato. No ta bisa si di kua dato ta papia. 

E koperashon aki a kondusí na lantamentu di un Business Intelligence Unit, kaminda miembronan di VBC ta interkambiá periódikamente dato ku Deloitte. Seguidamente ta transformá e dato den performance dashboards pa sostené VBC na momentu di tomo di desishon ku mester kondusí na alkansá su metanan stratégiko.

Deloitte ta konsehá VBC kon ta e mihó manera pa uza i interkambiá nan dato, teniendo data governance na kuenta. MCB a hasi e proyekto aki posibel, rekonosiendo e bentahanan di análisis di dato i e importansia di traha ku dato.

Adelanto tékniko ta hasi posibel ku empresanan ta rekonosé patronchi- i tendensianan, kombinando diferente fuente di dato. Esaki ta kondusí na desishonnan basá riba echonan, na lugá di riba ‘instinto’. Ku e medianan di privasidat i seguridat korekto ta kambia strategianan di empresa di ‘no komparti dato’ den ‘mester kompartí dato’. 

VBC i Deloitte ta pone e promé stapnan den e koperashon aki i ta demostrá kon eksitoso por apliká interkambio di dato. Ta transformá retonan di privasidat i seguridat den solushonnan hasiendo uzo huntu di teknologianan moderno i best practises. 

E inisiadónan di e proyekto ta spera di enkurashá mas empresa pa interkambiá dato. Investigashon di e ofisina konsultativo di maneho Gartner ta mustra ku empresanan ku ta apliká interkambio di dato, ta krea sinkuenta porshento mas chèns pa e empresa pa generá entrada i krese.