KRALENDIJK- E frakshon M21 na Boneiru ta yama pa un partihipashon mas grandi den e prosesonan di tumamentu desishon ku ta afektá e isla i su habitantenan. 

“Aunké Boneiru a bira parti integral di Reino Hulandes na 2010, e Eilandsraad, e órgano mas haltu di e isla ta keda eksklui fo’i desishonnan tuma pa gobièrnu Hulandes ku ta impaktá e bida diario di e pueblo Bonairiano”, asina líder di Frakshon Daisy Coffie ta skibi den un komuminado pa prensa den transkurso di djadumingu.

E frakshon M21 ta kere ku e Eilandsraad, komo e órgano mas haltu di gobièrnu di e isla, mester ser konsultá riba desishonnan ku tin impakto riba e poblashon.

Bureau pa Asuntonan Konstitushonal

Pesei e Frakshon ta hasi un yamada pa lantamentu di un Bureau pa Asuntunan Konstitushonal i Asuntunan di Estado, manera tambe un portfolio pa Asuntunan Konstitushonal i Asuntunan di Estado den e estruktura di gobièrnu aktual. 

E frakshon ta kere ku esaki lo asegurá un partisipashon i representashon mas haltu di e pueblo Bonairiano den e prosesonan di desishon.