WILLEMSTAD – Segun Ramon Yung di e partido den gobièrnu MFK ta nesesario pa registrá tur persona indokumentá na Kòrsou, di manera ku outoridatnan sa unda nan ta i ku por duna nan asistensia.

Yung ta mustra ku spesialmente hóbennan tin derecho riba enseñansa, pero despues di finalisá nan estudio no por optené un diploma pasobra nan ta indokumentá.

Nan no por drenta e proseso laboral normal. Komo konsekuensia ku e hóbennan aki ta traha den e sektor informal i no ta kontribuí na kaha di gobièrnu, segun Yung, òf nan ta kore asta riesgo di kai den sirkuito kriminal.

Státus di estadia

Un parti di e solushon ta pa regla un státus di estadia legal pa tur persona indokumentá, di moda ku nan por kuminsá traha legal. “Registrando tur persona indokumentá, nos ta haña sa presis di kuantu hende nos ta papia i kon nos por atendé e situashon aki,” segun Yung.

Asignando un státus legal na personanan indokumentá por resultá positivo segun Yung, pasobra nan por traha dentro di e sirkuito normal i kontribuí na kaha di gobièrnu. Si esaki ta alkansabel no ta kompletamente kla si pa e miembro di parlamentu di MFK.