KRALENDIJK- Ministerio Públiko (OM) ta apelá e sentensia di Emiliano T, ku a ser kondená pa un prizòn di 3 aña, di kua 2 aña ta kondishonal, dor korte na Boneiru.

T. a risibí e sentensia pa e aksidente mortal di tráfiko ku a tuma lugá riba promé dia di Pasku 2022, kaminda el a kore outo bou di influensia di alkohòl i a dal e siklista Paul Berenzinski mata. Banda di e  kastigu di prizòn, T. tambe a risibí un prohibishon di kore outo kondishonal di 36 luna. Tanto OM komo e famia di e víktima a haña e sentensia ku a ser imponé muchu suave. Awor OM a desidí pa apelá e sentensia. 

E apelashon lo ser tratá dor di Korte Komun di Hustisia di Aruba, Kòrsou, Sint Maarten, Bonaire, Sint Eustatius i Saba. Sinembargo, por tuma un bon tempu promé ku e kaso di apelashon ser trata i ta ekspektá ku Emiliano T. lo rekobrá su libertat promé ku final di 2023. 

Libertat

Abogado di T. a enfatisá ku su kliente no mester warda te e momentu di trata e kaso di apelashon, pero ku el lo rekobrá su libertat na final di e kastigu originalmente impone. “Si tin kambionan den e sentensia i e kastigu ta bira mas pisá, posiblemente el lo mester bai bèk prizòn, pero tin tambe e chèns ku e kastigu keda igual”, asina abogado Marga van Lieshout a bisa.