KRALENDIJK – Djabièrne último Boneiru a demostrá ku nos por uni forsa i lucha pa un minimo soshal hustu. Hendenan di tur kategoria, di tur edat, di tur koló polítiko, sindikato, doñonan di trabao, polítiko i NGO, a partisipá na e manifestashon pa demostrá nan solidaridat ku esnan vulnerabel na Boneiru.

Pa medio di esaki UNKOBON ta gradisí tur hende pa nan partisipashon. Danki speshal na e organisadónan di e manifestashon. Boso a hasi un trabou di kita sombré. 

UNKOBON ta mira e formidabel asistensha na e manifestashon aki komo un enorme sosten pa e kaso den korte ku UNKOBON ta hibando for di aña pasá kontra estado di Hulanda pa logra stipulashon di un minimo soshal real i hustu. Naturalmente nos ta sigui spera sinembargo ku un veridikto di juez no ta nesesario pasobra Hulanda, komo konsekuensha di nos manifestashon, finalmente bai disidí di stipulá un minimo soshal hustu entrante 1 di yanüari 2024.