KRALENDIJK- E anterior lider sindikal i awendia konsehero di Federashon General di Obrero Boneriano (AFBW) ta hasi un yamada riba residentenan di e isla pa kolokgá bandera hulandes kabes-abou te ora gobièrnu hulandes establesé un salario minimo sosial aseptabel pa e islanan BES. 

E lucha pa di determiná e minimo sosial ta durando ya kaba pa 13 aña. Vários komishonnan i ekspertonan a studia e problema, pero gabinetena suksesivo na Den Haag a nenga di tuma akshon basá riba e resultadonan di investigashonnan.

Abdul, un di e organisadónan di e marcha di protesta siman pasá, ta desilusioná pa e falta di kompromisonan firme di Hulanda. “Komo representante di AFBW, mi ta hasi un yamada pa hisa e bandera hulandes kabes abou pa demonstrá nos mal kontentu. Mi ta sinti mi desilusioná  awe, pasobra gatinete Rutte no ta parse dispuesto pa fiha un minimo sosial pa yanüari di e aña venidero.  Laga nos mustra Hulanda kon mal kontentu nos ta. Nos ta sigui hasi esaki te ora Gabinèt finalmente trata e problema aki debidamente. Esaki ta loke ami ta proponá”, asina Abdul a bisa durante un enkuentro ku entre otro prensa lokal.

Desilusioná

Abdul no ta e úniko ku ta mustra desilusioná den desidia di Hulanda. E Konseho Insular den su reunion di siman pasá tambe a mustra un sentimento ku ta kasi síniko den un enkuentro ku miembronan di Komishon Thodé, ku ta investigando e nivel deseá di e salario minimo sosial.

Aunke sekretario di estado Alexandra van Huffelen a mustra su mes impreshoná pa e magnitú di e demonstrashon, ela bisa tambe ku e ta pensa ku implementashon di e salario minimo sosial nobo pa dia promé di yanüari 2024 ta ‘muchu ambisioso’.