DEN HAAG – For di 18 di mei a inkorporá e archivonan di e personanan ku a hasi katibu i nan desendientenan na Sürnam i Antia Hulandes den Memory of the World Register (MoW-register) di UNESCO. E registro MoW ta kontené patrimonio ku un nifikashon eksepshonal pa mundu, asina Archivo Nashonal na Den Haag ta informá.

E archivonan ku a inkorporá den e registro MoW ta kontené registronan di katibu, manumissie i emansipashon i tambe dokumentunan di registro sivil di katibunan ku a saka liber.

Ta trata di e periodo di 1816 te 1969. Otro partinan di archivo ta trata kompensashon ku anterior doñonan di katibu tabata risibí despues di abolishon di sklabitut na 1863.

Tambe a inkorporá e kolekshon di Kòrsou Zíkinza den e registro. E kolekshon di Zíkinza ta konsistí di 1410 grabashon oudio di entrevistanan di añanan 1950 i 1960.

Asina a graba kantikanan, anékdotanan históriko, storia- i deskripshonnan di bida diario den e lenga materno Papiamentu i e idioma Guene, ku mientrastantu a disparsé.

Fuera di portadónan físiko manera archivo di papel i teipnan oudio, a inkorporá tambe archivo digital den e registro, manera índisenan digital di e registronan di katibu.

Seri- i archivonan ku a inkorporá den e registro MoW ta: 

• Registronan di katibunan Sürnam (1830-1863)
• Índise Digital di e Registro di Katibu Sürnam
• Registro Manumissie, Sürnam (1832-1863)
• Registro di Emansipashon, Sürnam (1863)
• Registronan di Katibu, Kòrsou (1839-1863)
• Índise Digital Registro di Katibu, Kòrsou
• Archivo di  Registro Sivil – Nasementu, Fayesimentu, Registronan di Boutismo i Registronan di Katibunan ku a saka liber, Kòrsou (1831-1863)
• Kolekshon Zíkinza, Kòrsou (1955-1969)
• Kolekshon Juliana-Brenneker, Kòrsou (1856)
• Notisianan di Gobièrnu (ku menshon di manumissie), Sürnam i Kòrsou (1816-1863)
• Dokumentunan tokante abolishon di sklabitut den West-Indië (informenan di kompensashon), Kontrolaria General, Hulanda (1863-1868)
• Registro di Emansipashon, St. Maarten (1863)
• Kartanan na diferente persona,  St. Maarten (1847-1861)

E archivonan aki ta paresido ku e archivonan ku a registrá anterior di West-Indische Compagnie (Inkorporá den e Memory of the World Register na 2011) i e Registry of Slaves of the British Carribean 1817-1834 (inkorporá na 2009).

Nominashon kompartí

E nominashon kompartí titulá ‘Documentair erfgoed van de tot slaaf gemaakte mensen van de Nederlandse Caraïben en hun nazaten’  ta konsistí di archivonan ku ta den kuater pais, di kua tres ta forma parti di Reino Hulandes. 

E Servisionan Nashonal di Archivo di Sürnam, Kòrsou i Hulanda a uni forsa huntu ku National Archeological Anthropological Memory Management (Kòrsou), i gobièrnu di Sint Maarten pa introdusí e archivonan importante aki serka UNESCO.