WILLEMSTAD – E sektor hospitalario ta kontentu ku yegada di un di tres kompania di aviashon Corendon, ku ta bula di Hulanda pa Kòrsou. Pero e alegria ta bira ménos pa motibu di e eskases enorme di personal riba e isla. Esei Hans Slier, presidente di e asosiashon di sektor hotelero, CHATA, a splika ayera durante un konferensia di prensa den hotèl Corendon.

E falta di trahadó ta asina agudo ku restorantnan mester sera nan porta parsial- òf kompletamente pa motibu di eskases di personal i konsekuentemente hotèlnan no por mantené nan nivel di servisio.

Slier a deskribí un senario pesimista awor ku banda di e airlift kresiente – ku ta mas ku bonbiní – i mas kamber di hotèl e personal ta keda atras.

Poblashon 

“Tur aña e poblashon di Kòrsou ta disminuí ku tres mil persona, tur aña tres pa kuater mil persona ta bandoná e proseso di labor pa motibu di enbehesimentu”, segun Slier.

Empresarionan di industria di outo ta keha ku maneho di imigrashon no ta enfoká riba partisipashon di trahadónan strañero. 

P’esei CHATA ta hasi un yamada riba gobièrnu pa traha un maneho ku ta dirigí riba kresementu di forsa laboral. Mester di por lo ménos djes mil trahadó pa tene e ekonomia di Kòrsou aktivo.

“Nos mester di un poblashon kresiente pa mantené nos nivel di prosperidat i bienestar na Kòrsou, maske ta pa yena e fondonan sosial ku ta birando bashí i pa sigui ku e kuido di salubridat, pero tambe e sistema di penshun AOV. Aki poko tempu nos mester traha te ku nos 70 aña, tin un chèns real ku mester redusí e AOV te na mitar si nada no sosodé”, segun Slier ta bisa.

Finalmente segun e presidente di CHATA mester di un poblashon di minimal 250.000 persona pa keda relativamente outónomo, sin dependensia di Hulanda.