WILLEMSTAD – Fundashon Fondo di Penshun Vidanova a kumpra e parti sùit di e terenonan di Oostpunt, ku for di 1868 ta den man di famia Maal. Ta trata di un tereno di 1089 hèktar.

Ku e benta aki a generá kuarenta mion florin. Pa e kompra di e terenonan Vidanova a lanta un BV, pero a alohá partinan di e terenonan tambe den kompanianan di invershon apart, manera Eastpoint Development i Pelikan Creek Curaçao.

Oostpunt

E área ku den boka di pueblo yama Oostpunt, manera e plantashinan Klein Sint Joris, Oranjeberg, Fuik, Duivelsklip i Oostpunt, i parselanan di laman i tera ei banda, ta kubri masoménos 4400 hèktar.

Willem Pieter Maal (1839-1888) a kumpra e plantashinan aki konsekutivamente separadamente di e anterior doñonan. E tabata Yu di Kòrsou di di dos generashon i un empresario i negoshante hopi eksitoso, ku tabata doño di hopi edifisio i depósito, karpinteria di boto i wafnan na banda di Punda i Otrabanda den Willemstad. 

Maal tabata doño tambe di hopi barku di bela ku tabata transportá karga entre e islanan, Suramérika, Panamá i Europa.

Den kareda di 1870 Maal a bende su waf- i fasilidatnan di traha barku den Willemstad ku S.E.L. Maduro, fundadó di SEL Maduro & Zonen. Ku e ganashi aki Maal a invertí den bienes inmóvil den e parti ost di Kòrsou.

Maal a kumpra plantashi Fuik, despues plantashi Duivelsklip i Oostpunt. Alrededor di 1872 Maal a kumpra plantashi Santa Barbara, ku tabata den su poder kaba i ku tabata banda di plantashi Fuik.

Industrialisashon

Huntu ku su primu Michael Brown Gorsira (tata di Cornelis “Sjon Nene” Gorsira) Maal a lanta riba plantashi Santa Barbara Curacaosche Phosphaat Maatschappij NV. E Kompania di Fosfat di Kòrsou a bira e promé industria na Kòrsou i a transformá e ekonomia di un ekonomia agríkula pa un ekonomia industrialisá. 

Ku e ganashi di e eksplotashon di fosfat Maal a kumpra e sobrá plantashinan Klein Sint Joris i Oranjeberg, di moda ku henter e parti ost di e isla a bira di un doño.

Apesar di e tantísimo konflikto- i disputanan durante periodonan largu e Mijnbouwmaatschappij den Sta Barbara hopi lukrativo a transformá e kolonia Kòrsou for di 1875 di un ekonomia skur ku hopi debe ku tabata depende di agrikultura, ku un desempleo hopi haltu, dependiente di gobièrnu Hulandes, den un ekonomia industrialisá outosufisiente ku oportunidat di trabou kasi total.

Dunadó di trabou

Ta danki na Mijnbouwmaatschappij ku Kòrsou por a realisá pa promé biaha den historia un saldo positivo riba presupuesto i no tabatin mester di ayudo finansiero di Pais Madre Hulanda.

Te ku lantamentu di Curacao Petroleum Industry na 1917, refineria SHELL, Curacao Mining Company, tabata e dunadó di trabou mas grandi riba e isla ku kasi 600 empleado.

Fuera di ta e akshonista mayó di Curacao Mining Company, WP Maal tabata mientrastantu for di 1879 e doño di tereno mas grandi den e parti ost di Kòrsou, ku tereno ku ta kore di St. Jorisbaai na kosta nort di Oostpunt i bin bèk Fuikbaai te na kosta sùit.

Riba e tereno- i plantashinan aki Maal tabata aktivo den agrikultura, krio di bestia, industria minero i krio di mondi ekstensivo. Tabata uza spesialmente Fuik i Klein St Joris pa krio di bestia ekstensivo (mayoria biaha kabritu i karné), uzando e depósito- i wafnan na Fuikbaai pa transportá ganado i produktonan pa Willemstad i e otro islanan. 

Datonan ta mustra asta di transporte e tempunan ei di produkto pa Sürnam i South Carolina, loke ta mustra e magnitut di e aktividatnan.

Willem Pieter Maal I a muri riba 2 di novèmber 1888, na edat hóben di 49 aña. Su biuda Eliza Maal-Guilhoux, a kontinuá ku su empresa- i esfuersonan te na su morto na 1923 i seguidamente e herederonan di W.P.Maal i biuda Maal-Guilhoux.

Komo tal e propiedatnan a pasa pa e desendientenan dirèkt di Willem P. Maal († 1888), Eliza Maal-Guilhoux († 1923), Joseph Michael Maal († 1933), Dr. Willem Pieter (“Willy”) Maal († 1959) i Willem Pieter (“Boy”) Maal († 1998) i aktualmente herederonan di “Boy” Maal.