WILLEMSTAD – Tur skol di enseñansa di fundeshi i enseñansa spesial por manda nan alumnonan kas for di 12’or di mèrdia. Esei ministerio di Enseñansa ta informá. E medida ta konta te ku djabièrnè.

Kòrsou tin algun dia kaba ta padesiendo di un kalor inmenso. Meteo a dekretá kódigo hel i esei ta nifiká ku temperaturanan lo alkansá  alrededor di 37.5 grado.

Segun e ministerio esaki lo por kondusí na kehonan di salú serka sierto grupo di persona. Den e kuadro aki ta referí na e protokòl di kalor ku a akordá. Ta pidi direktivanan di skol i skolnan pa promé ku tuma akshon, manera por ehèmpel seramentu di skol, pa tuma kontakto ku e organisashon di ehekushon di e ministerio pa kordiná.

Ta sugerí alumnonan pa bisti paña fresku, eventualmente desviando di e unifòrm di skol. Skolnan mester fasilitá awa friu i laga e alumnonan bisti paña fresku i evitá aktividatnan den solo. Riba dianan ku ta hopi kalor mester evitá tambe deporte i moveshon, manera lèsnan di gimnasia despues di 10’or na temperatura di 34 grado i mas haltu.