KRALENDIJK- Djaweps ku a pasa un total di 44 estudiantenan a risibí nan sertifikado despues di a sigui un kurso di hospitalidat organisá pa Fundashon FORMA.

Ta trata aki di un koperashon entre Entidat Públiko Boneiru (EPB) i instituto pa edukashon di segunda oportunidat. E kursonan ta mehorá e oportunidatnan di partiipantenan den e merkado laboral.

Diputado Thielman, bou di ken su periodo komo diputado di turismo e programa a keda desaroyá, ta kontentu ku e éksito di e entrenamentonan. “Pa nos bishitantenan ta importante pa mira kara konosí ora nan ta bolbe na e isla. Pesei nos ke duna oportunidat na nos habitantenan fihamentu pa mehor trabou i mas apresio den nan labor.”

Aktual diputaod di Ekonomia i Turismo, Jolinda Craane, tambe ta entusiasmá. “E hendenan aki ta hopi importante pa Boneiru. Mi ta spera tambe ku tur hende lo tin hopi benefisio di loke nan a sinja. Mi ta spera tambe ku nan por sigui krese den nan desaroyo i entrada.”

Dentro poko lo kuminsá  mas kursonan nobo komo parti di e programa.