KRALENDIJK – Grifier di Konseho Insular, Arjen de Wolff djadumingu a manda un relato pa prensa pa duna un bista di tur e lokualnan e delegashon a hasi durante nan bishita di kasi dos siman pa Europa. 

“Konseho Insular di Bonaire kada aña tin algun biahe di trabou pafó di Bonaire. Esakinan ta den e kuadro di reforsá e relashonnan i influensiá legislashon eksistente òf legislashon den preparashon, pa futuro legislashon i reglamentashon ta sirbi interesnan di Bonaire”, asina de Wolff a splika.

Konseho Insular pa regla tin tur aña den luna di yüni un bishita di trabou na Hulanda. Den e luna ei tin e kongreso anual di e Asosiashon di Munisipio Hulandes (VNG), un partner importante pa Entidat Boneriano pa loke ta trata, entre otro, sosten tékniko, konseho i asistensia den stipulashon di maneho.

De Wolff a sigui splika ku e bishita di trabou kada aña ta trata un òf mas tema ku na e momentu ei ta di importancia próksimo formashon i tomo di desishon di Konseho Insular. E biahe di trabou no ta solamente partisipá na Kongreso di munisipio hulandes pero ta dirigí tambe riba e partinan atministrativo i polítika ku ta Den Haag. Banda di esei e biahe di trabou ta aportá na konosementu di miembronan di Konseho insular. Pa tal motibu e aña aki un bishita na Åland tabata parti di e bishita di trabou.

Temanan sentral

E aña aki tabatin temanan ku e siguiente tópikonan sentral: pobresa, mínimo sosial pa lei, sistema di enseñansa; kambionan den Lei Entidatnan Públiko Bonaire, Sint Eustatius en Saba (WolBES) i Lei di Finansa Públiko Bonaire, Sint Eustatius en Saba Bonaire, Sint Eustatius en Saba (FinBES); prosesamentu di sushi, adaptashon di klima, transishon energétiko i ekonomia sirkular.

Banda di e bishita na Åland, e delegashon tambe a partisipá na e kongreso anual di Asosiashon di Munisipio na Hulanda (VNB). 

Demas bishitanan di trabou

Riba petishon di Konseho Insular di Bonaire Konsehonan Insular di Bonaire, Saba i Statia a hiba kombersashon ku profesor Hoogers, profesor riba tereno di komparashon di derecho konstitushonal, spesialista den derechi di reino i ko outor di e rapòrt “Het Koninkrijk Tegen Het Licht” ku el a publiká na 2019 riba enkargo di Tweede Kamer. 

A papia tambe e diferente modelo pa organis gobernashon propio bou di mesun konstitushon nashonal, por ehempel na islanan Faeröer, Groenland i algun otro den region ku un sierto grado di gobernashon propio, manera e ta eksistí entre Repúblika Franses, Reino Unido i nan teritorionan di ultramar.

Un delegashon di Konseho Insular a bishitá na Breda un instalashon moderno i inovativo den prosesamentu di sushi pa orientá riba mehorashon di rekohé i prosesá sushi na Bonaire.

Kolaboradornan di Grifi Insular a sigui un programa di estudio i a bishitá grifinan nan di Groningen i Den Haag pa atkerí konosementu di método i prosesonan di e aparato di un Grifi mas grandi.

E bishita di trabou a terminá ofisialmente riba 18 di yüni 2023.