Kralendijk – “Boso ta un ehèmpel, un modelo pa komunidat mi ta spera ku boso lo sigui desplegá e bunita komportashon aki ku ta un estímulo pa grandi i chikí.”

Esaki Gezaghèber Edsion Rijna a bisa e seis personanan ku djabièrnè a haña nan kondekorashon real. Ta trata di Henna Winklaar, Maria ‘Riet’ Sealy- Clappers, Janice Lee Baillie Huckaby, Oswin Cristina, Reynolds ‘Nolly’ Oleana, Edwin ‘Win’ Emerenciana.

For di dia di Rei den aprel a yama tur e seis kondekoradonan i informá nan ku su Mahestat Rei Willem Alexander ta honra nan pa nan trabou pa komunidat. Pa motibu di e medidanan di corona, no por duna nan kondekorashon na e momento ei. Awor ku si ta posibel pa tene un enkuentro chikitu, a invitá nan i nan famia pa un momento ofisial na unda Gezaghèber a bisti nan nan kondekorashon.

Lid Oranje Nassau a bira Janice Lee Baillie Huckaby i Oswin Cristina. Ridder Oranje Nassau ta Henna Winklaar, Maria ‘Riet’ Sealy- Clappers, Reynolds ‘Nolly’ Oleana, Edwin ‘Win’ Emerenciana.

Yamada

E komishon di Kondekorashon Real ta hasi un yamada na komunidat pa informá nan di personanan ku ta hasi trabou balioso pa nos dushi Boneiru. Nan ta meresé un rekonosementu pa e trabou indispensabel pa e komunidat.