WILLEMSTAD – Banko Sentral ta intervení di nobo na Algemene Spaar- en Kredietcoöperatie ACU. No ta logra e Asamblea General pa nombra un Konseho di Supervishon, ku finalmente tin komo tarea prinsipal pa  nombra un direktiva nobo. 

Na yüli 2022 a introdusí un modelo atministrativo kooperativo modernisá na ACU. Statutonan ku Komishon di Aktualisashon di Statutonan di ACU a traha den konsulta ku un notario i spesialistanan riba tereno di kooperativanan a drenta na vigor.

A nombra un komishon di kandidatura ku a ehekutá su tarea i a presentá kandidatonan na Asamblea General di ACU pa nombramentu den Konseho di Supervishon.

Pero e nombramentu di un Konseho di Supervishon, konforme e modelo di atministrashon di yüli 2022, te ku dia di awe no a kristalisá i tampoko no tabatin efekto durante e Asamblea General di 25 di yüni último. Supuestamente miembronan di ACU ta kontra e statutonan nobo i pa e motibu ei a vota kontra e tres kandidatonan di e Konseho di Supervishon.

Banko Sentral ta èksigí kumplimentu ku normanan di gobernashon. Ku intervenshon di awor e nombramentu di e kandidatonan, ku a proponé pa kandidato den Komishon di Supervishon, no por kontinuá. ACU mes ta responsabel pa implementashon di su modelo di atministrashon, entre kua nombramentu di un direktiva.