Kralendijk – Poder di kompra pa habitantenan di Hulanda Karibense a subi na 2019 kompará ku na 2018. Poder atkisitivo a mehorá prinsipalmente debí na e oumento di salario, kompensashon finansiero pa yu, suèldu mínimo i ònderstant. Na Sint Eustatius i Saba, e poblashon a mira un oumento ku un promedio di 4,9 porshento kompará ku 2018, na Boneiru esaki tabata 3,9 porshento. E personanan ku ta haña ònderstant i personanan den famia di un mayor so a benefisiá mas tantu. CBS ta informá tokante esaki a base di su sifranan nobo.

Di 2012 pa 2017, e promedio di poder di kompra a oumentá anualmente na Hulanda Karibense. Na 2018, e nivel promedio di preis na Boneiru i Saba a oumentá mas ku e entradanan, kual a okashoná un kaida den e poder di kompra. Na 2019, a tuma algun paso pa mehorá e supsistensha, kual a pone ku personanan riba tur e tres isla a bai dilanti den poder di kompra. Por ehèmpel, e redukshon di kontribushonnan di dunadó di trabou pa ku seguro di trahadó a krea espasio pa un oumento di salario. Tambe a oumentá e suèldo mínimo i ònderstant.

E poder di kompra promedio di famia ku entrada prinsipalmente di labor a mehorá ku 4.8 porshento na Sint Eustatius. Un kambio di e promedio di poder di kompra di 4.8 porshento na 2019 ta enserá ku pa mitar di e personanan konserní, nan forsa di kompra a oumentá ku 4.8 porshento o mas i e otro mitar ménos. Pa famia ku entrada prinsipalmente di ònderstant, Boneiru ta e isla ku a ekspereshá e oumento di mas haltu den poder di kompra, esta ku un 7.2 porshento. Un di kada sinku famia a bai atras den forsa di kompra.

Mayoria adelanto di poder di kompra ta serka famianan ku tin yu

Riba e tres islanan, e poder di kompra a mehorá den promedio na tur tipo di kas di famia. Komo resultado di e oumento di kompensashon di yu, e poder di kompra a subi, prinsipalmente serka personanan den kas di famia ku yunan menór di edat. E oumento tabata mas haltu serka personanan den kas di famia ku solamente un mayor. Aki e poder di kompra a subi ku 8.2 porshento, 7.4 porshento i 9.4 porshento, respektivamente, na Boneiru, Sint Eustatius i Saba. E poder di kompra a baha den ménos ku un di kada tres personanan den kas di famian ku solamente un mayor.

Hóbennan a benefisiá mas tantu

E poder di kompra a subi pa tur grupo di edat riba e tres islanan. Pa personanan te ku 40 aña, e poder di kompra a oumentá ku 4.8 porshento, 5.9 porshento i un 7.0 porshento, respektivamente, pa Boneiru, Sint Eustatius i Saba. E personanan aki te ainda ta trahando riba  nan karera profeshonal. Den e kas di famia ku nan ta forma parti di dje, tambe hopi bes tin mucha. E personanan aki a benefisiá di e oumento di salario i e oumento den kompensashon di yu.

Un oumento mas grandi den poder di kompra a ser eksperenshá dor di esnan ku entradanan mas abou na Boneiru

E poder di kompra a oumentá den tur grupo di entrada na 2019. Na Boneiru i Sint Eustatius, e promedio di poder di kompra a mehorá mas tantu pa personanan den kas di famia den e kategoría di entradanan mas abou, respektivamente ku 7.0 porshento i 5.4 porshento. Na Sint Eustatius, e poder di kompra a subi pa personanan den kas di famia den e kategoría di entrada di mas haltu ku 5.3 porshento.

Fuente
StatLine – Caribisch Nederland; koopkrachtontwikkeling personen in particuliere huishoudens
https://opendata.cbs.nl/statline/#/CBS/nl/dataset/83551NED/table?dl=36C1A

Splikashon

Desaroyo di poder di kompra

E desaroyo di poder di kompra di un persona ta ser kalkulá komo e kambio den porsentahe di aña riba aña di e entrada standarisá disponibel pa kada kas i ahustá pa e kambio di preis. E kambionan den porsentahe aki ta ser kalifiká di mas abou pa mas haltu, i e balor medial – sea e balor promedio òf balor medial – ku ta ekspresá den e kambio di poder di kompra di e sup-populashon relevante. E poder atkisitivo (dinámiko) por kambia dor di vários motibu. Por ehèmpel, entrada ta kambia dor di un oumento di salario, promoshon, aseptá (otro) trabou i bahamentu ku penshun. Tambe kambionan den e komposishon di famia (un yu ta bai foi kas, parehanan ta separá) ta kondusí na un kambio den entrada. Tur e kambionan aki ta ser tené na kuenta den e desaroyo dinámiko di e poder di kompra.

Gruponan di Entrada

E promedio di entrada disponibel standarisá pa kas, pa kada persona, ta ser kalkulá basá riba e añanan 2018 i 2019. E klasifikashon di e gruponan di entrada ta basá riba e promedionan basá riba añanan 2018 i 2019. Por lo tantu, ta hasi un korekshon pa regreshon na e promedio. E gruponan di entrada ta ser determiná pa kada isla.

Mehoria den supsistensha

Na 2019, e Ministerio di Asuntunan Sosial i Empleo (SZW) a inisiá un redukshon struktural den e kontribushonnan di dunadó di trabou pa seguro di trahadónan. Esaki ta pèrmití dunadó di trabou oumentá salarionan sin mester oumentá nan gastunan di salario. Na 2019, e kontribushonnan a baha di 18.3 porshento pa 13.4 porshento. Dependiendo di e kontribushonnan di e dunadó di trabou relashoná ku prima di penshun, esaki ta enserá un oumento di salario di entre 3.4 i 4.4 porshento. E salario mínimo a subi ku 5 porshento i e benefisionan di ònderstant, AOV i AWW a subi ku 5 porshento, ademas di e indeksashon anual na 2019

Oumento di kompensashon pa yu

Na 2019, e kompensashon a ser oumentá ku mas di 50 porshento. Na Boneiru, e suma mensual pa kada yu a oumentá di $ 40 a $ 62. Na Sint Eustatius i Saba, e suma di $ 42 a ser oumentá pa $ 64 mensual pa kada yu.

---

Lesa tambe:

• 
  Sindikalismo na Boneiru parti 47, 25 di novèmber 2024
• 
  Curoil ta hasi su mes kulpabel na komportamentu sin rèspèt, pero gobièrnu ta tolerá esei 
• 
  Gobièrnu di Boneiru ta urgi solushon pa suma di impuesto liber i salario mínimo
• 
  M21 ku krítika duru riba Curoil pa problema ku depósito pa bòter di gas 
• 
  Atrobe atrako armá na Boneiru: E biaha aki riba supermerkado