KRALENDIJK – Den e último dianan, hopi hende na Bonaire a spanta dor di loke nan ta deskribí komo kuentanan di koriente hopi mas haltu ku ta di kustumber. Un post riba medianan sosial tokante e kuentanan haltu a risibí mas di 300 “like” den un tempu kòrtiku, miéntras hopi hende tambe a raportá risibí kuntanan muchu mas haltu i den sierto kaso asta dòbel, kompará ku e lunanan anterior.  

WEB a respondé preguntanan di ABC Online Media, poniendo ku e konsumo mas haltu di koriente por ta kousá pa kalor di último lunanan. Segun e distribuidor di koriente, esaki lo por a kousa un konsumo ku ta 20 te 25% mas haltu ku e konsumo habitual.

Sinembargo, tin personanan ku a raportá kuentanan ku ta kasi dòbel mas haltu ku lunanan anterior. Mester bisa ku e observashonnan ta varia ampliamente. Tin klientenan tambe ku ta bisa ku nan no a risibí un kuenta mas haltu, miéntras ku usuarionan di sistema di pago pré-pago PagaBon ta bisa ku nan konsumo di koriente a keda meskos ku tabata a kaso den otro lunanan tras di lomba.

Raportá

Un portabos di WEB ta konsehá klientenan pa informá nan kompania di energía den kaso ku nan konsumo di koriente subi notablemente. “Solamente ora klientenan yega serka nos i presentá nan kuenta, nos por investigá si en berdad tin diferensianan ineksplikabel.”

Kehonan por wòrdu entrega tambe via e-mail na: [email protected]